Kryetari i Partisë Demokratike, Sali Berisha, ka njoftuar datën e re për protestën, si pjesë e “mosbindjes civile” që ka filluar pas dënimit me burg të ish-deputetit të PD-së, Ervin Salianji. Protesta do të mbahet të shtunën në orën 12:00 në Shkodër, në një moment të ndjeshëm për qytetin, i cili së fundmi u trondit nga një atentat i mirëorganizuar që i mori jetën tre personave, duke lënë një të plagosur rëndë. Ndër viktimat është edhe Flutura Basha, një qytetare e pafajshme, ndërsa bashkëshorti i saj është në gjendje të rëndë.

Berisha theksoi se protesta do të shërbejë për të shprehur solidaritet me qytetarët e Shkodrës, duke e cilësuar këtë si një përgjigje ndaj dhunës dhe krimit të organizuar që, sipas tij, qeveria e kryesuar nga Edi Rama po mbështet. “Duhej të ishte bërë në Tiranë, por do t’i shprehim solidaritetin qytetarëve të Shkodrës, të cilët kanë përballur dhunën e hanxharëve të krimit,” tha Berisha.

Ai kritikoi gjithashtu ministrin e Brendshëm, Ervin Hoxha, duke e akuzuar atë për neglizhencë në arrestimin e autorëve të dhunës në qytet. “Shkodra e di mirë kush është atentatori. Pyet ministrin pse nuk arrestuat atentatorin e shtatorit në zemër të qytetit. Jo vetëm që nuk e arrestuan, por nuk i shkuan as një herë për të kontrolluar shtëpinë e tij, edhe pse e kishin të filmuar,” shtoi ai.

Kjo protestë do të jetë e treta që opozita organizon si pjesë e aksionit të saj të mosbindjes civile, pas protestave të mëparshme më 7 tetor dhe 29 tetor, të cilat përfshinë hedhjen e molotovëve dhe bllokimin e rrethrrotullimeve në akset kryesore të vendit.