Sali Berisha, i shpallur “non-grata” nga Shtetet e Bashkuara të Amerikës dhe Britania e Madhe, mund të jetë deputet vetëm për disa ditë të tjera. Pas 20 qershorit, Komisioni i Mandateve pritet të shpallë zëvendësimin e tij, për shkak të mos përmbushjes së funksionit të parlamentarit. Nëse Berishës i digjet mandati, vendin e tij mund ta zërë Lediana Frataj sipas listës së kandidaturave. Nëse ajo nuk e pranon mandatin brenda 30 ditëve, karrigia e deputetit do t’i kalojë emrit tjetër në listë.
Jo vetëm deputetë të Foltores, por edhe socialistë, kanë spekuluar se Berisha nuk mund të përjashtohet pasi mungesa e tij është “me arsye”. Por Parlamenti i Shqipërisë ka treguar që nuk do ta pranojë këtë justifikim. Administrata e Kuvendit i ka ndërprerë Berishës përfitimet financiare që i takojnë çdo deputeti, përfshi edhe pagën, pasi ai nuk ka marrë pjesë në asnjë prej seancave plenare, mbledhjet e Komisioneve Parlamentare apo çdo veprimtari tjetër që lidhet me funksionin e tij si ligjvënës. Ky vendim është marrë në përputhje me vendimin e GJKKO-së.
Sipas ligjit, mandati i një deputeti mund të mbarojë nëse ai mungon pa arsye mbi 6 muaj rresht në Kuvend. Me përfundimin e këtij afati këtë javë, pritet të nisë procedura e humbjes së mandatit të Berishës.
Kujtojmë se Sali Berisha ndodhet në “arrest shtëpie” që prej 30 dhjetorit, pas vendimit të GJKKO-së. Ai kishte kundërshtuar më parë masat që i kishte vendosur SPAK, duke pretenduar se ishin anti-Kushtetuese pasi SPAK nuk kishte marrë leje nga Kuvendi për të kufizuar veprimtarinë e tij si deputet. Pasi SPAK mori autorizimin nga Kuvendi, vendosi masën më të rreptë të arrestit shtëpiak, e cila është konfirmuar nga të gjitha shkallët e drejtësisë, përfshi edhe Gjykatën e Lartë.
SPAK po heton Berishën dhe dhëndrin e tij, Jamarbër Malltezin, për vepra penale të lidhura me pastrimin e parave dhe korrupsionin. Malltezi fillimisht u arrestua, por më vonë masa e sigurisë ndaj tij u ndryshua në “arrest shtëpie”. Hetimet lidhen me procedurat e ndjekura për privatizimin e ish-kompleksit “Partizani”.
