Kryetari i Partisë Demokratike, Sali Berisha, ka ndarë sot në rrjetet sociale një video ku dokumentohet momenti kur një tifoz shqiptar nxirret me forcë nga stadiumi nga policia.

Në postimin e tij, Berisha denoncon ashpër këtë veprim, duke e cilësuar si një akt antidemokratik dhe pjesë e “narko-regjimit të Edi Ramës”. Ai thekson se ngjarja është e papranueshme dhe nuk ndodh as në Beograd, duke aluduar në mënyrën se si trajtohen simbolet dhe liritë e tifozëve në vendet fqinjë.

Në videon e shpërndarë nga Berisha, shihet momenti kur policia ndalon një tifoz që mban një bluzë me stampën e Ushtrisë Çlirimtare të Kosovës (UÇK), dhe më pas e nxjerr jashtë stadiumit.

Berisha shkruan:

“As në Beograd nuk ndodh! E nxjerrin tifozin nga stadiumi se kishte një bluzë me stampë të UÇK! Dënoj me neveri një akt të tillë të shëmtuar antidemokratik prej vasali të Edi Ramës dhe narko-regjimit të tij!”

Ai gjithashtu i drejtohet drejtpërdrejtë ndjekësve duke përfshirë mesazhin dhe videon e tifozit dixhital:

“Mirëmëngjesi Dr.Sali Berisha! Një tifoz u largua mbrëmë nga policia e Shqipërisë vetëm sepse mbante një maicë me mbishkrimin UÇK. Dhe kjo nuk ndodhi në ndonjë vend të huaj, por në zemër të Shqipërisë, nga policia shqiptare, nën qeverisjen e Edi Ramës!”

Ngjarja ka shkaktuar reagime të shumta në rrjetet sociale dhe diskurs politik në vend, duke përplasur opozitën dhe mazhorancën mbi liritë qytetare dhe trajtimin e simboleve kombëtare në publik.