Kryetari i Partisë Demokratike, Sali Berisha, ka dhënë një pasqyrë të plotë të jetës së tij, duke ndarë kujtimet nga rinia, familja, profesioni dhe karriera politike. Ish-presidenti dhe ish-kryeministri ka kombinuar historitë personale me sfidat e vendimeve të mëdha politike, duke rrëfyer si vendosi të braktiste profesionin e mjekut për t’iu përkushtuar politikës.

“Nuk e kisha menduar ndonjëherë se mund të merresha me politikë,” tha Berisha, duke theksuar pasojat e mundshme për familjen në një kohë kur çdo kundërshtim mund të shoqërohej me pasoja të rënda. “Por pasojat më të rënda do i paguanin fëmijët dhe gruaja. Na mungonte dinjiteti njerëzor, sepse ne tjetër mendonim dhe tjetër flisnim, ishte imponuar njeriu diktaturë.”

Berisha tregoi se uria kronike dhe vështirësitë e përditshme të shqiptarëve ishin nxitja më e madhe për të hyrë në politikë. “75% e shqiptarëve ishin me uri kronike, me sëmundje nga më të ndryshme. Ishte vetëm buka e misrit. Kjo ishte nxitje e madhe për mua, se kaloi në barbari,” shpjegoi ai, duke kujtuar situatën në vitin 1988, kur fshatarëve u jepeshin vetëm kafshë të pakta si shpërblim.

Vendimi për t’u përfshirë në politikë, tha Berisha, ishte më i vështiri dhe më i rëndësishmi: “Ramiz Alia në pamje dukej tolerant, por në të vërtetë ishte një marksist-leninist i bindur.” Rrëfimi i tij pasqyron tensionin midis dëshirës për të ndihmuar popullin dhe sfidave personale që politika mund të sjellë.