Kryetari i Partisë Demokratike, Sali Berisha, ka reaguar pas vendimit të Apelit të GJKKO, duke e cilësuar atë si një “pilulë elektorale për të pashpresin Edi Rama.” Në një prononcim për mediat nga selia blu, Berisha theksoi se vendimi është politik dhe pa bazë ligjore, ndërsa shtoi se do ta respektojë vendimmarrjen e gjykatës.

Berisha paralajmëroi se ky vendim do të përfshihet në dosjen që ai ka depozituar në Gjykatën e Strasburgut.

“Pa asnjë bazë ligjore, pilulë elektorale për të pashpresin Edi Rama. Përpjekje e dështuar e organizatës kriminale, SKAP i partisë, për të justifikuar veprën e tyre dhe në këtë kontekst, dëshmi e re e kontrollit të plotë dhe total të SKAP-it nga Rama, si dhe zbatimit të urdhrave të tij politikë. Çështjen e kam në Strasburg dhe do ta respektoj vendimin. Kjo do ta pasurojë këtë rast dhe do t’i shtohet dosjes së Strasburgut.” – deklaroi Berisha.

Deklarata e tij vjen në një moment të rëndësishëm politik dhe ligjor, ku përplasjet mes opozitës dhe mazhorancës vazhdojnë të jenë në qendër të debatit publik.