Në daljen e tij të parë pas lirimit nga burgu, ish-deputeti i Partisë Demokratike, Ervin Salianji, vijon akuzat ndaj qeverisë dhe drejtësisë shqiptare, duke deklaruar se burgosja e tij ishte një veprim i qëllimshëm për ta nxjerrë jashtë loje përpara zgjedhjeve.

“U dënova për të shmangur betejën zgjedhore. Jemi në një situatë ku vullneti i një individi vendos dhe përcakton mbi çdo institucion dhe ligj,” – u shpreh Salianji me tone të ashpra.

Ai rikujtoi se denoncimi që bëri ndaj një trafikanti droge kishte sjellë pasoja konkrete – përfshirë dorëzimin e këtij të fundit në drejtësinë italiane – por vetë ai përfundoi në burg si rezultat i këtij akti.

“Pasojat që solli denoncimi im, ishte që një i dënuar për trafik droge u dorëzua në Itali,” – theksoi ai.

Salianji e konsideroi periudhën e vuajtjes së dënimit si një “kosto personale për të mos u dorëzuar para së vërtetës”, ndërsa akuzoi sistemin e drejtësisë se është i infiltruar nga eksponentë të mazhorancës.

“E kam marrë si një kosto të mosdorëzimit të të vërtetës apo moralit që ka individi. I gjithë gjykimi është bërë me familjarët e zyrtarëve të Partisë Socialiste,” – tha ai.

Sipas tij, drejtësia në vend po shndërrohet në një armë për të goditur opozitën dhe për të intimiduar këdo që nuk pranon të heshtë.

“Një sistem gjyqësor përdoret për të goditur një kundërshtar politik, për të intimiduar persona që kanë probleme me ligjin,” – përfundoi Salianji, duke paralajmëruar një rikthim të fortë në arenën politike.

Deklaratat e tij pritet të ndezin debat në skenën politike, ndërkohë që vetë Salianji ka paralajmëruar një angazhim të ri dhe aktiv në opozitë.