Janë publikuar imazhet e para nga samiti historik i Alaskës, ku presidenti rus Vladimir Putin dhe presidenti amerikan Donald Trump shihen të ulur pranë njëri-tjetrit, përpara një sfondi të madh me mbishkrimet “Pursuing Peace” (Drejt Paqes) dhe “Alaska 2025”.

Takimi, i cili ka nisur sot, ka në qendër mbarimin e luftës në Ukrainë dhe synon të krijojë bazat për një proces paqeje, ndërkohë që vëmendja ndërkombëtare është e përqendruar tek ky moment kyç i diplomacisë botërore.

Në sallë kanë qenë të pranishme delegacionet respektive, përfshirë ministrin e Jashtëm rus Sergei Lavrov dhe senatorin amerikan Marco Rubio. Ndërsa gazetarët vijonin me pyetjet e tyre, në një moment Putin duket se ka folur me zë të lartë, duke iu përgjigjur drejtpërdrejt njërës prej tyre, raportoi BBC. Ky episod shënoi një nga momentet e para të tensionit në takim.

Ndërkohë, prania e Volodymyr Zelensky mungon në këtë format, duke ngritur pikëpyetje për rolin e Ukrainës në procesin e paqes. Megjithatë, analistët vlerësojnë se samiti synon jo vetëm ndalimin e luftës, por edhe një rivendosje të ekuilibrave ndërkombëtarë, ku SHBA dhe Rusia po testojnë sërish aftësinë për të negociuar mbi një konflikt global.

Ky takim, i konsideruar si më i rëndësishmi mes dy vendeve që prej Luftës së Ftohtë, do të përcaktojë jo vetëm fatin e Ukrainës, por edhe marrëdhëniet e ardhshme mes Washingtonit dhe Moskës.