Sammy Miri, kreu i klanit famëkeq Miri, ka dalë sot përpara drejtësisë në Gjermani nën masa ekstreme sigurie. 38-vjeçari u shoqërua në gjykatë nga forca të shumta të policisë speciale, ndërsa transporti i tij u krye me mjete të blinduara. Për të shmangur çdo komunikim apo orientim gjatë rrugës, Miri kishte sytë e mbuluar dhe kufje në vesh.

Pranimi i akuzave dhe justifikimi

Gjatë seancës, Miri pranoi se ka shitur kokainë, por pretendoi se e kishte bërë këtë nën presionin e një bande shqiptarësh. Sipas tij, shqiptarët e kishin detyruar të përfshihej në trafik droge, për të shlyer një borxh të vëllait të tij.

Ai deklaroi se banda shqiptare i kishte propozuar të blinte kokainë prej tyre dhe ta shiste, ndërsa fitimet do të shkonin për të mbuluar borxhin e vëllait të tij, i cili aktualisht është i dënuar me 14 vite burg.

Rrezikon një dënim të rëndë

Miri akuzohet për trafik të sasive të mëdha të drogës, një vepër penale që mund t’i kushtojë një dënim të gjatë me burg. Vendimi për të pritet të shpallet në mars të këtij viti.