Shtetet e Bashkuara po planifikojnë të ndërmarrin sanksione që të ndërpresin disa banka kineze nga sistemi financiar global, në përpjekje për të ndaluar mbështetjen tregtare të Pekinit për prodhimin ushtarak rus, sipas raporteve të Wall Street Journal.

Ndërsa Sekretari i Shtetit Antony Blinken mbërrin sot në Pekin, pyetja është nëse kërcënimi i Shteteve të Bashkuara për të përdorur një nga mjetet e tyre më të fuqishme të detyrimit financiar mund të dëmtojë tregtinë komplekse dhe të lulëzuar midis Pekinit dhe Moskës, e cila ka lejuar Kremlinin të rindërtojë një ushtri dëmtuar nga dy vite luftime në Ukrainë.

Megjithatë, Kina ka kundërshtuar akuzat e Shteteve të Bashkuara për mbështetjen ushtarake të Pekinit për Rusinë në konfliktin me Ukrainën, duke i quajtur ato “të pabaza”. Zëdhënësi i Ministrisë së Jashtme, Wang Wenbin, e theksoi këtë para vizitës së Sekretarit të Shtetit amerikan Antony Blinken.