Detaje të reja kanë dalë nga ngjarja e rëndë që tronditi Shkodrën, ku gjyqtari Astrit Kalaja u qëllua me armë pas shpalljes së vendimit në një proces gjyqësor për pronësinë.

Sipas dëshmive të siguruara nga Ora News, gjithçka nisi në momentin kur Gjon Shkëmbi, një prej palëve në proces, iu drejtua gjyqtarit me fjalët:

“Se po vërtetoj ato që ka thënë e gjithë Shkodra për ty që ti je…”

Në këtë çast, gjyqtari Kalaja është përgjigjur me ton të qetë:

“Vazhdo ti, vazhdo.”

Por menjëherë pas kësaj, Elvis Shkëmbi, nipi i Gjonit, ka nxjerrë armën nga brezi dhe ka qëlluar drejt magjistratit, duke shkaktuar panik në sallën e gjyqit.

Gazetari Edison Vatnikaj raporton se dëshmitë e para tregojnë se pas të shtënave ndaj gjyqtarit, Elvis Shkëmbi ka hapur zjarr edhe ndaj palës tjetër në proces, ku janë plagosur Ervis dhe Ragip Kurtaj, baba e bir.

Në dëshminë e tij përpara prokurorëve, Ervis Kurtaj ka rrëfyer momentet e frikshme:

“Sapo dëgjova krismat, tërhoqa babain tim drejt korridorit për t’u larguar. Personi që qëlloi mbi gjyqtarin, më pas qëlloi edhe drejt nesh. Plumbat na zunë të dyve.”

Ndërkohë, Gjon Shkëmbi ka pohuar se nuk kishte dijeni për atë që do të ndodhte:

“Jam viktimë në këtë rast. Nuk kam vrarë askënd, s’kam asnjë plagë. Elvisi është djali i vëllait tim, kemi një pronë të përbashkët për të cilën ishim në gjyq, por nuk dija asgjë për veprimet e tij.”

Prokuroria po vijon hetimet për zbardhjen e plotë të motivit dhe dinamikës së ngjarjes, ndërsa gjyqtari Astrit Kalaja ndodhet në spital nën kujdes mjekësor.

Ngjarja ka tronditur opinionin publik dhe ka rikthyer në vëmendje çështjen e sigurisë së magjistratëve në sallat e gjyqit, veçanërisht në proceset me konflikt pronësie.