Këngëtari dhe producenti i njohur Sean “Diddy” Combs po përballet me zhvillime të reja ligjore, pasi prokuroria ka kërkuar që videot e sekuestruara gjatë bastisjeve në rezidencat e tij në Los Angeles dhe Miami të përdoren si prova në gjyqin që pritet të zhvillohet së shpejti.

Sipas raporteve të mediave të huaja, pamjet që thuhet se përmbajnë momente eksplicite dhe dëshmi për abuzime të ndërlidhura me trafikimin seksual dhe shantazhin mund të kenë ndikim të madh tek juri. Autoritetet i kanë cilësuar videot si “tronditëse”, duke përfshirë përmbajtje të ndjeshme që lidhen me disa viktima të mundshme.

Në anën tjetër, mbrojtja e Diddy-t ka paraqitur një pyetësor të detajuar për përzgjedhjen e jurisë, duke përfshirë pyetje mbi gatishmërinë e anëtarëve të mundshëm për të parë përmbajtje të rënda vizuale. Prokuroria e ka cilësuar këtë pyetësor si një manovër për të ndikuar në përzgjedhjen e jurisë.

Gjyqi pritet të zgjasë rreth tre javë, megjithatë përfshirja e materialeve të reja mund të shtyjë procesin për më shumë kohë. Ky proces gjyqësor mund të jetë një nga më të bujshmit në industrinë e muzikës në vitet e fundit.