Burime diplomatike në Washington kanë konfirmuar se sekretari i shtetit amerikan, Antony Blinken, është duke planifikuar vizitën e tij të parë në Shqipëri. Vizita pritet të jetë një vlerësim i marrëdhënieve të ngushta midis Shqipërisë dhe Shteteve të Bashkuara, duke e cilësuar Shqipërinë si një aleate të rëndësishme në NATO.

Detajet e vizitës dhe qëllimi i saj ende nuk janë bërë të njohura, por pritet të sjellë një sërë takimesh zyrtare dhe diskutimesh mbi çështje të rëndësishme ndërkombëtare dhe regionale. Kjo do të jetë vizita e parë e Antony Blinken në Shqipëri, duke treguar vazhdimin e angazhimit të administratës së Presidentit Joe Biden në rajonin e Ballkanit.

Ishte vetë sekretari amerikan i shtetit Antony Blinken, ai i cili në maj 2021 shpalli Sali Berishën si person “Non Grata” nga SHBA për korrupsion dhe minim të demokracisë. Kjo u shoqërua me një sulm frontal nga Berisha në adresë të Blinken.

Vizita e parë e një sekretari amerikan shteti në vendin tonë ishte ajo e James Baker, në Tiranë më 22 qershor 1991. Ndërsa e dyta vizitë e një tjetër sekretari amerikan shteti ishte ajo e Madeleine Albright, më 19 shkurt 2000, ku mbajti edhe një fjalë në parlamentin shqiptar. Pasuar nga një tjetër vizitë e John Kerry, më 14 shkurt 2016.

Ardhja e Antony Blinken në vendin tonë do të shënojë vizitën e katërt të një sekretari shteti në Shqipëri.