Livorno, Itali – Një sasi rekord prej mbi 2000 kilogramësh kokainë është sekuestruar në orët e fundit në Portin e Livornos, në një nga operacionet më të mëdha antidrogë të kryera ndonjëherë në territorin italian. Sipas autoriteteve, lënda narkotike ishte e një cilësie të lartë dhe e paketuar në 1800 pako, e fshehur me kujdes brenda një kontejneri që transportonte kakao.

Anija e ngarkuar me drogë ishte pjesë e linjës detare të kompanisë Mersin Express, me itinerar të nisur nga Porti i Guayaquil në Ekuador – një nga nyjet më të njohura të trafikut të drogës në Amerikën Latine.

Sipas Guardia di Finanza dhe Agjencisë Doganore Italiane, vlera në treg e kokainës së sekuestruar do të kapte shifrën mbi 500 milionë euro. Pas analizave laboratorike që konfirmuan pastërtinë e lartë të drogës, autoritetet italiane kanë urdhëruar asgjësimin e menjëhershëm të saj në një incenerator në rajonin e Toskanës.

Ky operacion i suksesshëm konfirmon edhe një herë rolin kyç që luan Italia si portë hyrëse e trafikut ndërkombëtar të drogës në Evropë, por edhe angazhimin e institucioneve për të parandaluar përhapjen e narkotikëve në kontinentin e vjetër.