Policia e Tiranës ka finalizuar operacionin e koduar “Fraud”, për gjurmimin dhe sekuestrimin e pasurive të dyshuara se rrjedhin nga veprimtari kriminale. Në kuadër të këtij operacioni, janë sekuestruar katër pasuri të paluajtshme me një vlerë totale prej 1.2 milionë euro, të cilat janë në pronësi të shtetasit Erjon Kasmi, 42 vjeç, i dënuar më herët për mashtrim kompjuterik në bursa.

Sipas njoftimit zyrtar të Policisë së Shtetit, pasuritë e sekuestruara përfshijnë një apartament, dy vendparkime për automjete dhe një subjekt tregtar, të cilat dyshohet se janë përfituar përmes aktiviteteve të paligjshme në fushën e mashtrimit financiar.

Vendimi për sekuestrimin e këtyre pasurive është dhënë nga Gjykata e Posaçme Kundër Korrupsionit dhe Krimit të Organizuar (GJKKO), e cila më herët kishte shpallur fajtor Erjon Kasmin si organizator të një skeme mashtrimi përmes call center-ave, duke i shkaktuar dëme të mëdha financiare investitorëve të huaj.

Në bazë të vendimit të GJKKO-së, fillimisht ai ishte dënuar me 11 vite burg, por për shkak të aplikimit të gjykimit të shkurtuar, përfundimisht do të vuajë një dënim prej 7 vitesh e 4 muajsh burgim.

Operacioni “Fraud” u krye nga Seksioni për Hetimin e Pastrimit të Parave dhe Aseteve Kriminale i Drejtorisë Vendore të Policisë Tiranë, në drejtimin e SPAK-ut (Struktura e Posaçme Kundër Korrupsionit dhe Krimit të Organizuar).

Policia njofton se hetimet do të vazhdojnë për të identifikuar çdo pasuri tjetër të mundshme të përfituar nga aktiviteti kriminal, ndërsa materialet procedurale janë referuar pranë SPAK-ut për veprime të mëtejshme ligjore.