Në një operacion të fundit antidrogë të koduar “Pakot”, Policia e Shtetit ka sekuestruar 3.4 kilogramë kokainë në pikën kufitare të Muriqanit. Lënda narkotike u gjet e fshehur në tavanin e një furgoni që po hynte në Shqipëri, drejtuar nga Adriatik Rrasa, 32 vjeç, banues në Lushnjë, i cili u arrestua në flagrancë. 

Gjatë kontrollit të automjetit, përveç kokainës së ndarë në tre pako, u zbuluan edhe 60 shishe pije alkoolike dhe një televizor, të dyshuara si mallra të kontrabanduara, pasi nuk dispononin dokumentacionin përkatës. 

Operacioni u zhvillua nga shërbimet e Pikës së Kalimit Kufitar Muriqan, në bashkëpunim me Seksionin për Hetimin e Narkotikëve të Drejtorisë Vendore të Policisë Shkodër. Lënda narkotike, mallrat e kontrabanduara, automjeti dhe dy celularë të sekuestruar gjatë operacionit, u morën në cilësinë e provës materiale. 

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme ligjore.