Policia e Korçës ka finalizuar me sukses operacionin e koduar “Holiday” duke arrestuar dy të rinj për goditjen e veprimtarisë së paligjshme të prodhimit dhe shitjes së narkotikëve.
Në prangat e policisë kanë rënë shtetasit me iniciale M. Ll, 29 vjeç dhe K. D, 33 vjeç pasi gjatë kontrollit në automjetin e tyre iu sekuestrua 1 kg kanabis dhe një grirëse metalike për lëndën narkotike.
Materialet i kaluan Prokurorisë pranë Gjykatës së Shkallës së Parë Korçë për veprën penale “Prodhimi dhe shitja e narkotikëve”, kryer në bashkëpunim.
Njoftimi policia Korçë:
Finalizohet operacioni antidrogë i koduar “Holiday”.
Operacioni, për goditjen e veprimtarisë së paligjshme të prodhimit dhe shitjes së narkotikëve.
Vihen në pranga dy shtetas.
Sekuestrohet mbi 1 kg lëndë e dyshuar narkotike kanabis dhe një grirëse metalike për lëndë narkotike.
Specialistët e Seksionit për Hetimin e Narkotikëve dhe Trafiqeve të Paligjshme në DVP Korçë, nën drejtimin e Prokurorisë të Rrethit, finalizuan me sukses operacionin antidrogë të koduar “Holiday”, për goditjen e veprimtarisë kriminale të prodhimit dhe shitjes së narkotikëve, si rezultat i të cilit u bë kapja dhe arrestimi në flagrancë i shtetasve M. Ll., 29 vjeç, banues në Korçë dhe K. D., 33 vjeç, banues në fshatin Barç, Korçë.
Forcat e Policisë, pas informacioneve të siguruara në rrugë policore, se në aksin rrugor Pogradec-Korçë, një shtetas do të transportonte lëndë narkotike, organizuan shërbimet dhe bënë të mundur lokalizimin dhe kapjen e shtetasit M. Ll., me automjetin tip “Fiat”, në afërsi të fshatit Bulgarec, gjatë kontrollit të të cilit, në pjesën e brendshme të kofanos, u gjet 1 kg lëndë të dyshuar narkotike kanabis, e cila u sekuestrua në cilësinë e provës materiale.
Nga veprimet e mëtejshme hetimore rezulton se, bashkëpunëtor i dyshuar në këtë veprimtari kriminale ishte edhe shtetasi K. D., i cili kryente kontrollin e rrugës me mjetin tip “Smart”. Gjatë kontrollit të banesës së këtij shtetasi, shërbimet e policisë gjetën një sasi të vogël lënde të dyshuar narkotike kanabis dhe një grirëse metalike për lëndë narkotike.
Po vijon puna për dokumentimin e plotë ligjor të kësaj ngjarjeje dhe vënien para përgjegjësisë penale të personave të tjerë të implikuar në këtë veprimtari.
Materialet i kaluan Prokurorisë pranë Gjykatës së Shkallës së Parë Korçë për veprën penale “Prodhimi dhe shitja e narkotikëve”, kryer në bashkëpunim.
