Tre efektivëve Rifat Zeka, Beqir Sefi dhe Mustafa Shemi iu shqiptua masa e paraburgimit nga gjyqtari i procedurës paraprake në Kralevë, por nuk është ende e qartë se sa të jetë kohëzgjatja e qëndrimit të tyre në burg.
Qeveria e Kosovës pretendon se policët janë “rrëmbyer”, pasi, sipas saj, ata janë arrestuar në territorin e Kosovës. Por Serbia e mohon këtë, duke thënë se ata janë arrestuar në territorin e saj.
Ndërkohë pas SHBA-së edhe Britania e Madhe ka kërkuar lirimin e menjëhershëm të tre policëve të Kosovës.
Kryeministri i Kosovës, Albin Kurti tha se më herët se, mesa duket, prokurori në Serbi i ka hedhur poshtë akuzat për terrorizëm kundër tre policëve të arrestuar, ndërsa i ka mbajtur në fuqi vetëm akuzat për posedim të paligjshëm të armëve.
Kurti i bëri komentet gjatë një adresimi në Forumin e Prespës në Strugë.
Sot ndërkohë ka pasur sërish tënsione në veri të Kosovës e konflikte. Në Leposaviç është sulmuar fizikisht kameramani i RTK-së, Bardh Bekteshi, të cilit i është thyer edhe kamera. Në pamjet shihet sulmi i ekipeve të medieve dhe kameramani Bekteshi duke u rrëzuar.
Ndërkohë 4 shpërthime kanë ndodhur gjatë natës në afërsi të stacioneve policore në Zveçan dhe në Mitrovicën e Veriut. Policia thotë se dyshohet se ato u hodhën nga një automjet i cili ishte në lëvizje i cili është larguar nga vendi i ngjarjes.
Ndërkohë në pikën kufitare në Jarinjë janë krijuar radhë me kamionët që kanë ndaluar dhe presin, pas bllokadës që i ka vendosur qeveria e Kosovës mallrave serbe.
Si u përshkallëzua situata në veri të Kosovës
Këto zhvillime po ndodhin në kohë kur tensionet në veriun e Kosovës, të banuar me shumicë serbe janë rritur. Tre efektivë të Kosovës u rrëmbyen nga forcat serbe në veri. Kosova ka bërë thirrje për t’i liruar menjëherë, por sipas Serbisë ata janë arrestuar pasi janë gjetur duke patrulluar 1.8 km larg kufirit me veriun. Ndërkohë Departamenti Amerikan i Shtetit kërkoi një ditë më parë lirimin pa kushte të tre pjesëtarëve të policisë kufitare të Kosovës të rrëmbyer dje nga forcat serbe.
Tensionet nisën më 26 maj, kur kryetarët e rinj shqiptarë të komunave në veri, nën asistimin e Policisë së Kosovës, hynë në ndërtesat komunale, mes kundërshtimeve të serbëve lokalë. Tensionet kulmuan më 29 maj, kur në Zveçan, protestuesit serbë u përleshën me pjesëtarët e misionit të NATO-s në Kosovë, KFOR. Nga përleshjet u lënduan dhjetëra persona nga të dyja palët. Më 13 qershor, policia e Kosovës, kreu një aksion në Mitrovicë të Veriut, ku arrestoi Millun Millenkoviç, si i dyshuar dyshohet se ka qenë një prej organizatorëve të ngjarjeve në Zveçan më 29 maj.
