Serbia ka vazhduar të refuzojë dorëzimin e të dhënave të nevojshme nga arkivat e saj që mund të ndihmojnë në gjetjen e personave të zhdukur gjatë luftës nga forcat serbe. Në një intervistë për Ekonomia Online, Kushtrim Gara, përfaqësues i Komisionit Qeveritar për të Pagjeturit, kritikoi mungesën e gatishmërisë nga pala serbe për të ofruar informacionet e kërkuara, duke penguar përparimin e hetimeve dhe kërkimeve.

“Përkundër sfidave të mëdha, puna dhe angazhimi ynë janë sfiduar nga mungesa e informacioneve të besueshme, e cila ka ndodhur si rezultat i politizimit të këtij procesi nga institucionet e Serbisë. Ata po pengojnë vazhdimin e vlerësimeve dhe gërmimeve në lokacionet e shënjuara brenda territorit të Serbisë”, tha Gara. Ai shtoi se, megjithatë, ka pasur përparim në bashkëpunimin me familjet e të zhdukurve, shoqatat familjare dhe partnerët ndërkombëtarë, duke çuar përpara procesin e kërkimit për drejtësi dhe të vërtetë.

Gara vlerësoi përparimin në vitin 2024, ku janë realizuar mbi 33 operacione dhe aktivitete në terren, përfshirë 23 lokacione në Kosovë. Koordinimi me Institutin e Mjekësisë Ligjore dhe sektorin për personat e zhdukur ka mundësuar vlerësime dhe kërkime më të avancuara.

Për vitin 2024, janë realizuar gjithsej 38 identifikime të reja, përfshirë 26 identifikime viktimash që ishin të regjistruara në Listën e Personave të Zhdukur. Gara ka kërkuar përparim të mëtejshëm dhe prioritizimin e rasteve dhe lokacioneve si Batajnica, Bajna Bashta, Surdulica, Kozareva dhe rastet e njohura të zhdukjes, si Masakra e Tërnjes dhe rasti i Intelektualëve.