Uashington / Tiranë – Departamenti i Shtetit ka njoftuar anulimin e më shumë se 6,000 vizave studentore gjatë vitit 2025, si pasojë e tejkalimit të afateve të qëndrimit, shkeljes së ligjit dhe në disa raste mbështetjes për terrorizmin. Lajmi u konfirmua edhe nga Ambasada Amerikane në Tiranë, e cila shpërndau deklaratën e autoriteteve amerikane.

“Çdo vizë studenti e anuluar nën administratën Trump ka ndodhur sepse individi ose ka shkelur ligjin, ose ka shprehur mbështetje për terrorizmin ndërsa ndodhej në SHBA”, thuhet në reagimin e ambasadës.

Sipas raportimit të Fox News, administrata Trump ka ndërmarrë nisma të gjera për të kufizuar imigracionin dhe revokuar vizat për studentët që shkelin ligjin ose përfshihen në aktivitete të ndaluara. Rreth 4,000 nga vizat janë revokuar për shkak të shkeljeve ligjore, duke përfshirë sulme fizike, drejtim mjeti nën efektin e alkoolit ose drogës dhe vjedhje me thyerje.

Gjithashtu, 200 deri në 300 viza janë anuluar për studentë që kanë shfaqur mbështetje për organizata terroriste, kryesisht përmes mbledhjes së fondeve për Hamasin, të cilin SHBA e ka shpallur organizatë terroriste.

Në total, 40,000 viza janë revokuar gjatë vitit 2025, shumë më tepër krahasuar me 16,000 të tërhequra gjatë së njëjtës periudhë nga administrata Biden.

Sekretari i Shtetit, Marco Rubio, ka deklaruar se masa është pjesë e një strategjie më të ashpër për të mbrojtur sigurinë kombëtare dhe institucionet akademike amerikane:

“Do të vazhdojmë të revokojmë vizat e njerëzve që janë këtu si mysafirë, por që shkelin ligjin dhe prishin institucionet tona të arsimit të lartë.”

Megjithatë, demokratët kanë kundërshtuar këtë politikë, duke e cilësuar si një shkelje të procesit të rregullt ligjor dhe të lirive individuale.

Masa e re lidhet gjithashtu me urdhrat ekzekutivë të nënshkruar nga Presidenti Donald Trump, të cilët synojnë të forcojnë kontrollet e sigurisë kombëtare dhe të luftojnë antisemitizmin.