Shtetet e Bashkuara dhe Bashkimi Evropian kanë kundërshtuar ashpër vendimet e fundit të autoriteteve në Republikën Sërpska, duke i cilësuar si kërcënim për stabilitetin dhe rendin kushtetues të Bosnjë e Hercegovinës.

Presidenti i këtij entiteti, Millorad Dodik, ka dekretuar ligje të reja, të cilat ndalojnë veprimtarinë e institucioneve shtetërore si Gjykata dhe Prokuroria e Bosnjës, Agjencia Shtetërore për Hetime dhe Mbrojtje, si dhe Këshilli i Lartë Gjyqësor dhe Prokurorial.

Ambasada amerikane në Sarajevë e quajti këtë një “provokim të qëllimshëm” dhe një kërcënim të drejtpërdrejtë për sigurinë e Bosnjës dhe objektivat strategjike të SHBA-së. Uashingtoni i bëri thirrje udhëheqësve politikë të përmbahen nga veprimet destabilizuese dhe të respektojnë rendin kushtetues.

Nga ana tjetër, Bashkimi Evropian paralajmëroi se këto veprime bien ndesh me angazhimin e Bosnjës për integrim në BE. Brukseli kërkoi respektimin e Kushtetutës dhe vendimeve të gjykatave, si dhe ndalimin e presionit politik ndaj zyrtarëve shtetërorë.

Këto zhvillime ndodhin pak ditë pas vendimit të Gjykatës së Bosnjës për dënimin e Dodikut me një vit burg dhe ndalimin e tij nga funksionet publike për gjashtë vjet, për shkak të mosrespektimit të vendimeve të përfaqësuesit të lartë ndërkombëtar, Christian Schmidt.