Shtetet e Bashkuara kanë njoftuar një paketë të re ndihmash ushtarake me vlerë 275 milionë dollarë për Ukrainën, ndërsa vendi po përballet me vështirësi për të ndaluar avancimin e forcave ruse në rajonin Kharkiv.

Sekretari i Shtetit Antony Blinken tha se kjo ndihmë është pjesë e përpjekjeve për të ndihmuar Ukrainën të përballonte sulmin e Rusisë pranë Kharkivit. Ndihmat përfshijnë sisteme raketash të lëvizshmërisë së lartë HIMARS, predha të kalibrit 155 mm dhe 105 mm për goditjet me artileri, sisteme antitank Javelin dhe AT-4, mina antitank, autoblinda taktike, armë të lehta dhe municione.

Shtetet e Bashkuara dhe koalicioni ndërkombëtar do të vazhdojnë të qëndrojnë përkrah Ukrainës në mbrojtje të lirisë së saj, tha Blinken. Ndihmat e dhëna më herët kanë mbërritur në vijën e frontit dhe do të transportohen me shpejtësi për të ndihmuar ushtrinë ukrainase në mbrojtjen e territorit dhe të popullit të saj.