I dërguari i SHBA për negociatat në Lindjen e Mesme, Adam Boehler, ka shprehur optimizëm për arritjen e një marrëveshjeje armëpushimi në Gaza brenda javësh, pas bisedimeve të paprecedentë me Hamasin.

Në një intervistë për CNN, Boehler e cilësoi takimin si “shumë të dobishëm”, duke theksuar se një marrëveshje e mundshme mund të sjellë lirimin e të gjithë pengjeve, jo vetëm të robërve amerikanë.

Bisedime të paprecedentë me Hamasin

Boehler pranoi se ishte “e çuditshme” të takohej ballë për ballë me drejtuesit e Hamasit, një grup që SHBA e ka listuar si organizatë “terroriste” që nga viti 1997. Megjithatë, ai nuk e përjashtoi mundësinë e bisedimeve të mëtejshme me këtë grup palestinez.

“Në fund, mendoj se ishte një takim shumë i dobishëm. Mendoj se diçka mund të konkretizohet brenda javësh… Ka një marrëveshje e cila mund të sjellë lirimin e të gjithë pengjeve, jo vetëm amerikanëve,” – tha ai.

Reagimi i Izraelit dhe situata aktuale

Boehler theksoi se e kuptonte shqetësimin e Izraelit për këto bisedime, por shtoi se ishte e nevojshme të fillonin negociatat “të brishta” për të çuar përpara procesin e armëpushimit.

Sulmi i Hamasit ndaj Izraelit më 7 tetor 2023 solli 251 pengje, përfshirë disa shtetas amerikanë. Aktualisht, rreth 58 pengje mbeten ende në Gaza.

Boehler la të hapur mundësinë për bisedime të mëtejshme me Hamasin, duke shtuar se në diplomaci “nuk e di kurrë kur mund të vijë mundësia për të negociuar”.