Shefi i diplomacisë së Bashkimit Evropian, Josep Borrell, në Konferencën e Sigurisë në Munih më 18 shkurt, deklaroi se situata në Bregun e pushtuar Perëndimor nga Izraeli është pengesë e madhe për gjetjen e një zgjidhjeje afatgjatë për paqen mes Izraelit dhe palestinezëve.
“Bregu Perëndimor është një pengesë reale për zgjidhjen me dy shtete. Është në një pikë vlimi… mund të jemi në prag të një shpërthimi më të madh,” tha Borrell.
Në këtë territor, që Izraeli e ka pushtuar më 1967, rreth 490,000 izraelitë jetojnë së bashku me afër 3 milionë palestinezë në dhjetëra vendbanime që konsiderohen joligjore sipas ligjit ndërkombëtar.
Palestinezët e shohin ndërtimin e këtyre vendbanimeve si një krim lufte dhe si pengesë të madhe për paqen. Që nga fillimi i luftës mes Izraelit dhe Hamasit në Gazë më 7 tetor, në Bregun Perëndimor është regjistruar një numër në rritje i përleshjeve mes forcave izraelite dhe palestinezëve.
Borrell theksoi se BE-ja duhet të mbështesë nismën arabe për krijimin e një shteti palestinez, i cili do të përfshinte edhe Bregun Perëndimor, edhe Rripin e Gazës.
Këto deklarata vijnë pas refuzimit të kryeministrit izraelit, Benjamin Netanyahu, për një plan për njohjen ndërkombëtare të një shteti të tillë. Sipas The Washington Post, administrata e presidentit amerikan, Joe Biden, dhe disa shtete arabe po punojnë në një plan për një paqe afatgjatë mes Izraelit dhe palestinezëve, duke përfshirë edhe një afat kohor për themelimin e një shteti palestinez.
