Një ngjarje e rëndë ka tronditur qytetin e Stuttgartit në Gjermani, ku një 16-vjeçar u plagos me armë zjarri pas një konflikti të dhunshëm mes një grupi të rinjsh. Incidenti ndodhi në një shesh lojërash në lagjen Weilimdorf, ku sipas mediave lokale, 10 deri në 15 të rinj janë përfshirë në një përleshje fizike që degjeneroi në të shtëna.

Policia reagoi me shpejtësi, duke nisur një operacion të gjerë me 18 automjete policore dhe duke rrethuar zonën për të siguruar provat. Ekspertët e hetimit kriminal po punojnë për të identifikuar personat e përfshirë dhe për të zbuluar motivet që çuan në konflikt.

I mituri i plagosur u gjet disa minuta më vonë në lagjen Nordbahnhof, rreth 7 kilometra larg vendit të sherrit. Fatmirësisht, autoritetet kanë konfirmuar se gjendja e tij shëndetësore është jashtë rrezikut për jetën.

Për zbardhjen e plotë të ngjarjes, policia po analizion pamjet e kamerave të sigurisë dhe po merr dëshmi nga banorët e zonës. Hetimet vijojnë, ndërsa nuk përjashtohet asnjë pistë mbi shkaqet e konfliktit.