Reshjet e dendura të shiut që ranë mbrëmjen e kaluar kanë shkaktuar përmbytje në qytetin e Bulqizës, duke vështirësuar ndjeshëm qarkullimin mes dy lagjeve kryesore të qytetit.

Rruga pranë urës që lidh zonat e Bulqizës së Vjetër me Bulqizën e Re u mbush plot me ujë, duke u bërë burim aksidenti për automjetet që lëvizin drejt Peshkopisë.

Sipas banorëve, problemi përsëritet çdo herë që ka reshje, për shkak të bllokimit të kanaleve kulluese anësore të Rrugës së Arbrit dhe të kanalit ujëmbledhës që ndan dy lagjet.

Reshjet e shiut kanë qenë në formë shtrëngate, ndërsa në disa akse nacionale të Qarkut Dibër janë raportuar rëshqitje dherash dhe rënie gurësh, çka ka krijuar vështirësi të përkohshme në qarkullim.

Autoritetet lokale po punojnë për pastrimin e kanaleve kulluese dhe normalizimin e situatës, ndërsa kërkohet ndërhyrje e qëndrueshme për të shmangur përsëritjen e përmbytjeve sa herë bie shi.