Një ngjarje e rrallë dhe gëzueshme është shënuar në maternitetin “Koço Gliozheni”, ku Rozeta dhe Geraldo Vojkollari kanë sjellë në jetë katërnjakë, pas një shtatzënie natyrale.

Lajmin e bukur e ka ndarë vetë kryeministri Edi Rama përmes një postimi në rrjetet sociale, ku ka shprehur gëzimin për familjen që është bekuar “katërfish” me ardhjen në jetë të Roal, Alroa, Roar dhe Auro.

“Me lumturinë e familjes Vojkollari, të bekuar katërfish me ardhjen në jetë të Roal, Alroa, Roar dhe Auro në Spitalin Universitar Obstetrik-Gjinekologjik ‘Koço Gliozheni’, ku sigurisht mbështetja me bonusin e bebes vijon”, shkruan Rama.

Katërnjakët e porsalindur dhe nëna gëzojnë shëndet të mirë, ndërsa stafi mjekësor i maternitetit ka bërë të ditur se lindja është menaxhuar me sukses nga një ekip specialistësh.

Qeveria shqiptare, që prej vitit 2019, vijon zbatimin e programit të bonusit të bebes, nga i cili kanë përfituar rreth 227 mijë familje. Skema aktuale parashikon:
• 40 000 lekë për lindjen e fëmijës së parë,
• 80 000 lekë për fëmijën e dytë,
• dhe 120 000 lekë për lindjen e fëmijës së tretë.

Familja Vojkollari pritet të përfitojë edhe mbështetjen financiare të posaçme, si rast i veçantë i lindjes së katërfishtë.

Një ngjarje e tillë e rrallë natyrale sjell një valë pozitiviteti e shprese, duke u bërë simbol i jetës dhe gëzimit në një kohë kur Shqipëria po përpiqet të rrisë natalitetin.