Një aksident fatal tronditi mbrëmjen e kaluar segmentin rrugor Delvinë–Sarandë, ku dy motra, Elvisa dhe Rozina Dhimaku, respektivisht 22 dhe 20 vjeçe, humbën jetën, ndërsa shoqja e tyre mbeti e plagosur rëndë. Automjeti tip Audi, i drejtuar nga 23-vjeçari Kevin Norra, kreu një parakalim të gabuar gjatë kthimit nga Saranda drejt Gjirokastrës, duke rezultuar në përplasjen kokë më kokë me makinën e viktimave.
Pas testimit, Norra u gjet në gjendje të dehur, me një nivel alkooli prej 1.52 mg/l në matjen e parë dhe 1.42 mg/l në të dytën. Sipas burimeve, 23-vjeçari është specialist në Ministrinë e Brendshme, një fakt që nuk ishte bërë i ditur më parë nga autoritetet policore.
Dy motrat humbën jetën direkt në vendngjarje, ndërsa shoqja e tyre u transportua me urgjencë në Spitalin e Traumës dhe ndodhet nën kujdesin intensiv të mjekëve. Ndërkohë, Norra ndodhet në pranga dhe akuzohet për “Shkelje të rregullave të qarkullimit rrugor” dhe “Drejtim të automjetit në mënyrë të parregullt”.
