Komisioni i Pavarur i Kualifikimit (KPK) ka vendosur sot shkarkimin e gjyqtarit të Shkodrës, Tonin Sterkaj. Vendimi i shpallur më 4 Shtator 2024 ka ardhur pas një procesi të gjatë vetingu dhe hetimi të detajuar për këtë gjyqtar, i cili ishte përballur me një seri akuzash dhe shqetësimesh.

Në banesën e gjyqtarit Sterkaj, më 28 prill të këtij viti, ishte vendosur një sasi tritoli, një incident që kishte tërhequr vëmendjen e autoriteteve dhe kishte ndikim të rëndësishëm në procesin e rivlerësimit të tij. Procesi i vetingut për Sterkaj u krye nga trupa e KPK e kryesuar nga Alma Faskaj, me relatore Pamela Qirko dhe anëtare Xhensila Pine. Gerrit Sprenger ishte i pranishëm si vëzhgues ndërkombëtar.

Gjatë seancës dëgjimore të mbajtur më 3 Shtator 2024, gjyqtari Sterkaj u pyet dhe dha shpjegime për barrat e provës në kriterin e pasurisë dhe bilancin negativ prej 28.3 milion lekë, si dhe për disa gjetje të tjera në aspektin profesional. Komisioni njoftoi se pas shqyrtimit të dokumentacionit dhe zhvillimit të seancës dëgjimore, vendosi të shkarkojë nga detyra gjyqtarin Sterkaj në përputhje me ligjin nr. 84/2016.

Vendimi i arsyetuar me shkrim do t’i njoftohet subjektit të rivlerësimit, Komisionerit Publik dhe vëzhguesve ndërkombëtarë brenda 30 ditëve. Ky vendim mund të ankimohet në Kolegjin e Posaçëm të Apelimit nga subjekti i rivlerësimit dhe/ose Komisioneri Publik brenda 15 ditëve nga data e njoftimit. Ankimi depozitohet në Komisionin e Pavarur të Kualifikimit.