Tiranë – Një nga grupet më të fuqishme të narkotrafikut në jug të Shqipërisë është goditur nga SPAK dhe Europol, pas një hetimi të gjatë që zbuloi aktivitetin e tyre kriminal përmes aplikacionit të koduar Sky ECC.

Hetimet zbuluan se banda kriminale, e drejtuar nga Kristo Qirici dhe Eldjon Alushaj, kishte kultivuar hektarë me kanabis në Shqipëri dhe kishte trafikuar tonelata droge drejt Greqisë, Gjermanisë, Holandës dhe Spanjës.

Grupi vepronte mes viteve 2018-2021 dhe kishte ngritur një rrjet të fuqishëm mbështetjeje brenda Policisë së Shtetit, duke siguruar kalimin e drogës pa u shqetësuar nga autoritetet. Mes të arrestuarve janë edhe katër oficerë policie, mes tyre Ervis Alisinanaj (shef i krimeve në Lushnjë), Erdit Hazizaj, Shkëlzen Ruska (shef i Hetimit të Krimeve në Himarë) dhe Elvis Dervishi (shef i Policisë Kufitare Sarandë).

90 pasuri të paluajtshme dhe të luajtshme janë sekuestruar nga autoritetet, të cilat ishin regjistruar në emrat e anëtarëve të grupit kriminal dhe familjarëve të tyre.

Hetimet vazhdojnë, ndërsa SPAK ka ngritur akuza për “Trafikim të narkotikëve” në kuadër të një grupi të strukturuar kriminal. Ky rast vërteton edhe një herë infiltrimin e grupeve kriminale në institucionet shtetërore dhe përdorimin e teknologjisë për të maskuar aktivitetin e tyre të paligjshëm.