Guangdong, Kinë – Një ekip shkencëtarësh ka zhvilluar një pajisje inovative për ruajtjen e të dhënave, duke përdorur ADN-në si bazë. Pajisja, e ngjashme me kasetat magnetike të viteve ’80, është quajtur nga krijuesit e saj “kaseta e ADN-së” dhe ofron një mënyrë të qëndrueshme dhe ekologjike për ruajtjen e informacionit.

Sipas studimit të publikuar në “Science Advances”, kjo teknologji mund të ruajë 36 petabajt të dhëna, ekuivalente me 36 mijë hard disqe ose më shumë se tre miliardë këngë. Një nga sfidat kryesore të këtij sistemi ishte mënyra e aksesimit të informacionit, por ekipi i drejtuar nga Xingyu Jiang në Universitetin Jugor të Shkencës dhe Teknologjisë ka implementuar një sistem barkodimi, që lejon gjetjen dhe rikuperimin e saktë të të dhënave, si kërkimi i një libri në bibliotekë.

Një tjetër avantazh është mburoja kristalore e pajisjes, e përbërë nga zeolit imidazolat, e cila mbron ADN-në dhe garanton ruajtjen e të dhënave për shekuj me radhë, pa nevojën për energji elektrike.

Ekspertët e shohin këtë zhvillim si një hap të madh drejt zgjidhjeve të ruajtjes së informacionit me konsum minimal energjie, duke marrë parasysh rritjen e të dhënave të prodhuara nga inteligjenca artificiale dhe teknologjitë dixhitale.