Policia e Shtetit ka zhvilluar një tjetër operacion të gjerë kundër kultivimit të lëndëve narkotike në qarkun e Shkodrës, ku janë gjetur dhe asgjësuar gjithsej 19 739 bimë dhe fidanë të dyshuar narkotikë të llojit cannabis sativa.

Operacioni, i koduar “Koordinata”, është zhvilluar nga strukturat e Drejtorisë Vendore të Policisë Shkodër dhe komisariatet në varësi të saj, të mbështetura nga inteligjenca policore dhe kontrolle të thelluara në terren.

Zonat me prani më të lartë të bimëve narkotike rezultuan:
• Vau i Dejës, në njësitë administrative Shllak dhe Temal, ku u identifikuan dhe asgjësuan 893 fidanë dhe 16 700 bimë kanabisi;
• Shkodër, në zonat Shalë, Pult, Postribë dhe Gur i Zi, me 201 fidanë dhe 651 bimë;
• Pukë, në njësinë Qerret, ku u gjetën 1 050 bimë;
• Fushë-Arrëz, në njësinë Iballë, me 174 bimë të dyshuara narkotike.

Përveç goditjeve në terren, hetimet kanë nisur edhe për shpërdorim detyre dhe moskallëzim krimi ndaj disa funksionarëve lokalë. Kryetari i fshatit Kir, shtetasi S. H., dhe roja i mjedisit, L. A., janë proceduar në gjendje të lirë.

Policia thekson se do të vijojë me kontrolle intensive në të gjithë qarkun dhe apelon për bashkëpunim me qytetarët për të raportuar çdo aktivitet të paligjshëm që cënon rendin dhe sigurinë publike.