Shkodra – Një ngjarje e rëndë tronditi qytetin e Shkodrës ditën e djeshme, kur 34-vjeçari Kristian Kola u qëllua për vdekje në qendër të qytetit, jashtë një lokali ku po pinte kafe. Motra e tij, Mariza Kola, ka dhënë detaje prekëse rreth vëllait dhe rrethanave të ngjarjes.

“Më morën në telefon, më thanë vëllain tënd e kanë vrarë. Më kanë marrë nga shoqëria, jo familjarët fillimisht. Vëllai s’ka qenë me precedent penal. Ka punuar në ndërtim dhe nuk është marrë kurrë me gjë tjetër. Asnjëherë s’ka pasur konflikt apo hasmëri me kërkënd,” tregon Mariza.

Ajo theksoi gjithashtu se i ati nuk është lejuar të shohë trupin e vëllait, ndërsa ambulanca ka vonuar rreth një orë për të mbërritur në vendngjarje. “Është punë e policisë të gjejë autorët dhe të zbardhë çfarë ka ndodhur. Por unë dyshoj që policia është e implikuar në këtë krim. Dua vetëm drejtësi,” përfundon motra e viktimës.

Sipas informacioneve të policisë, dy autorët kanë qëlluar Kristian Kolën me 8 plumba, duke përdorur një armë me silenciator. Dyshohet se vrasja është kryer nga një profesionist, i cili ka studiuar objektivin dhe ka vepruar me kujdes. Pas ngjarjes, motomjeti i dyshuar i autorëve u gjet i djegur, ndërsa policia po kryen ekspertizë për të gjetur prova të mundshme dhe për të identifikuar personat që mund t’i kenë ndihmuar.

Autoritetet po hetojnë edhe pistat e tjera, ndërsa shkaqet e ngjarjes mbeten ende të paqarta. Më herët, viktima kishte pasur një konflikt të vogël rreth një viti e gjysmë më parë, i cili ishte mbyllur, dhe nuk konsiderohet pistë kryesore hetimore.

Kristian Kola dhe babai i tij kishin një kompani ndërtimi, ku punonin së bashku, dhe sipas familjarëve, 34-vjeçari nuk kishte asnjë problem ligjor apo konflikt të pazgjidhur.

Në Shkodër, qytetarët janë tronditur nga kjo ngjarje, ndërsa policia vijon hetimet intensive për zbardhjen e plotë të rrethanave dhe identifikimin e autorëve.