Me rastin e 5 Majit, në një ceremoni solemne, njëmbëdhjetë të rënë nga fshati Vajzë në Vlorë, që dhanë jetën për lirinë dhe dinjitetin kombëtar në periudha të ndryshme historike, u shpallën “Dëshmorë të Atdheut”.

Ministri i Mbrojtjes, Pirro Vengu, gjatë ceremonisë, theksoi se kjo nuk ishte thjesht një ceremoni nderimi, por një akt i drejtë moral dhe historik. Ai nënvizoi se shpallja e këtyre bijve të fshatit si dëshmorë është një borxh ndaj atyre që nuk jetuan më, por që u bënë simbol i rezistencës dhe luftuan për lirinë e Shqipërisë.

Ministri Vengu shtoi se “Në Vajzë, çdo pëllëmbë tokë është dëshmitare e përpjekjeve për lirinë dhe dinjitetin, një truall ku trimëria ka kaluar nga brezi në brez.” Ai e përshkroi këtë vend si një copëz të Shqipërisë që, përmes luftërave dhe sakrificave, ka ruajtur një përqendrim të jashtëzakonshëm trimash.

Statusi i Dëshmorit është një angazhim i ri për të përballuar sfidat e kohës dhe një përgjegjësi për të ruajtur dhe çuar më tutje amanetin e të rënëve. Vengu theksoi se detyrimi ndaj dëshmorëve dhe kombit nuk mbaron te lapidarët dhe certifikatat, por është një stafetë që duhet ta mbajnë brezat e ardhshëm për të arritur lartësinë e idealeve të tyre, deri në momentin që flamuri i dëshmorëve do të valojë i barabartë mes të barabartëve në Bashkimin Evropian.