Një polak është shpallur i pafajshëm për goditjen me grusht kryeministres së Danimarkës, Mette Frederiksen, duke argumentuar se ishte shumë i dehur për të kujtuar incidentin. I dyshuari, emri i të cilit nuk bëhet publik për shkak të kufizimeve ligjore, u paraqit në gjykatë në kryeqytetin danez, Kopenhagen, ku ishte akuzuar për dhunë ndaj një nëpunësi publik, si dhe për disa akuza të tjera për ekspozim të pahijshëm dhe mashtrim lidhur me incidente të tjera, sipas raportimit të BBC.

Frederiksen pësoi lëndime të lehta në qafë dhe në shpatull si pasojë e sulmit, i cili ndodhi vetëm tri javë pas plagosjes serioze të kryeministrit sllovak Robert Fico në një atentat. 39-vjeçari deklaroi në gjykatë se kishte pasur një ditë të keqe kur u përball me zonjën Frederiksen në Kopenhagen në qershor, vetëm dy ditë para zgjedhjeve të Parlamentit Evropian.

Ai shpjegoi: “Unë jam duke qëndruar ballë për ballë me zonjën kryeministre, [atëherë] nuk më kujtohet asgjë tjetër derisa u arrestova.” Frederiksen, e cila u godit me grusht në shpatull, arriti të largohej nga vendi i ngjarjes pa ndihmë. Ajo tha në atë moment se ishte “tronditur” nga ngjarja, por ndihej “mirë”. Pas incidentit, kryeministrja u dërgua në spital për një kontroll dhe më pas u tërhoq nga dita e fundit e fushatës për zgjedhjet evropiane. Ajo nuk do të thirret si dëshmitare në gjyq. Një nga truprojat e saj dëshmoi se burri i ishte afruar në një rrugë të populluar, i kishte thënë diçka të pakuptueshme dhe më pas i kishte dhënë “një grusht të fortë në shpatull”.

Frederiksen, 46 vjeçe, është udhëheqëse e Social Demokratëve të Danimarkës, partia më e madhe në qeverinë e koalicionit të Danimarkës. Ajo mori detyrën në vitin 2019, duke u bërë kryeministrja më e re në historinë daneze.