Një rrjet trafikantësh droge shfrytëzuan sezonin turistik për të trafikuar tableta ekstazi nëpërmjet linjës së autobusit të pasagjerëve Prishtinë-Durrës. Droga sintetike, e cila u sekuestrua dje në Tiranë (14 gusht) pasi vinte në Durrës, shpërndahej në Tiranë e në qytetet bregdetare të Shqipërisë nëpërmjet makinave të marra me qira. Në drogën ekstazi ishte stampuar logoja e markës luksoze ‘Louis Vuitton’.

Njoftimi i policisë:

Në kuadër të operacionit ‘Punisher 2’, u arrestuan 5 persona, pjesë e një rrjeti që trafikonte sasi të mëdha droge sintetike nga Kosova drejt Shqipërisë, ndërsa 3 anëtarë të tjerë të këtij rrjeti u prangosën në janar të këtij viti në Tiranë. Konkretisht janë vënë në pranga të policisë shtetasit Mithat Ramadani 30 vjeç, Besnik Mujeci, 40 vjeç, të dy banues në Prishtinë, si dhe Kalem Picari, 24 vjeç, Ambra Myftari 28 vjeçe, dhe Daniel Avdija 26 vjeç, të tre banues në Tiranë. Besnik Mujeci është aktivist i Lëvizjes Vetëvendosje, më konkretisht anëtar i Asamblesë komunale të Prishtinës.Pas mbledhjes, Lëvizja Vetëvendosje ka përjashtuar Mujecin si pjesë të partisë.
5 të arrestuarit u lokalizuan në kryqëzimin e rrugës ‘Myslym Shyri’ dhe ‘Sami Frashëri’, në Tiranë bashkë me dërgesën e lëndës narktoike. Konkretisht u sekuestruan 11300 tableta ekstazi MDMA, me peshë 5.093 kg dhe vlerë tregu rreth 400 mijë euro.

Policia thotë se droga shpërndahej në Tiranë e qytete bregdetare me makina me qira e për shkëmbimin e tabletave ekstazi caktoheshin vendet publike me shumë lëvizje dhe fluks njerëzish. Për arritjen e marrëveshjeve me shpërndarësit e drogave sintetike në Shqipëri, trafikantët kërkonin pagesa paradhënie, ose edhe lënien e automjeteve si garanci. Tabletat e ekstazisë MDMA, së bashku me një sasi lënde narkotike kanabis, një automjet, si dhe 5 aparate celulare, u sekuestruan në cilësinë e provës materiale.