Të paktën 41 persona kanë humbur jetën dhe 45 të tjerë janë plagosur si pasojë e një zjarri që shpërtheu brenda një kishe në qytetin egjiptian të Gizës. Zjarri ndodhi pak para orës 9:00 të mëngjesit gjatë meshës, ndërsa 5 000 njerëz u mblodhën në kishën Abu Sifin në lagjen Imbaba.

Autoritet egjiptiane bëjnë me dije se zjarri shpërtheu në një kondicioner në katin e dytë të ndërtesës së kishës si rezultat i një defekti elektrik. Zjarri bllokoi një hyrje në kishë, duke shkaktuar tragjedinë. Mësohet se shumica e viktimave janë fëmijë.

“Njerëzit po mblidheshin në katin e tretë dhe të katërt, dhe ne pamë tym që vinte nga kati i dytë”, thotë një dëshmitar i ngjarjes.

Ndërsa presidenti i vendit në një postim në Facebook shkroi: “Jam duke ndjekur nga afër zhvillimet e aksidentit tragjik dhe kam udhëzuar të gjitha institucionet shtetërore të përfshira që të marrin të gjitha masat e nevojshme dhe menjëherë të merren me këtë incident dhe pasojat e tij dhe t’u ofrojnë të gjithë kujdesin e nevojshëm shëndetësor të lënduarve”.

Ngjarje të këtij lloji nuk janë të pazakonta për Egjiptin pasi në fund të vitit 2020, një zjarr shpërtheu në një spital që trajtonte pacientët me COVID-19 duke lënë të vdekur shtatë persona dhe plagosur disa të tjerë.