Detaje të reja kanë dalë në dritë nga shpërthimi me tritol që tronditi mbrëmjen e djeshme qytetin e Sarandës, në një prej hoteleve të reja që është ndërtuar së fundi.

Policia ka shoqëruar 10 persona, të cilët janë marrë në pyetje, kryesisht dëshmitarë në vendin e ngjarjes gjatë momentit të shpërthimit në hotelin e Mariel Muratit, por ende nuk ka asnjë të dyshuar për ngjarjen.

Ky i fundit ka mbajtur postin e drejtorit të Aluizni-t në Sarandë, ndërsa në dëshminë e tij në polici ka thënë se nuk ka konflikte të hapura me askënd.

Ndërkaq burime pranë grupit hetimor bëjnë me dije se kamerat e hotelit “Yacht” kanë qenë jashtë funksionit në momentin e ngjarjes duke vështirësuar punën e policisë, e cila është detyruar të sekuestrojë kamerat e bizneseve dhe banesave përreth vendit të ngjarjes.

Te njëjta burime bëjnë me dije se autorët nuk kanë pasur qëllim shkatërrimin e hotelit, por paralajmërimin e pronarit ose prishjen e imazhit të tij pasi sasia e eksplozivi të vendosur ishte rreth 50 gram, ndërsa vendi ishte tek garazhi i tij, duke mos shkaktuar dëme të mëdha materiale edhe pse zhurma e shpërthimit u dëgjua fuqishëm në gjithë qytetin.

Madje dyshohet se autori ose porositësi të jetë i njëjte me ngjarjen e një viti më parë kur në të njëjtin hotel u vendos eksploziv.

Kjo për shkak se në rastin e 9 shkurtit 2021, ora e vendosjes ishte 19.10 ndërsa kësaj radhe 22.33, pra janë zgjedhur orare kur në qytet ka lëvizje dhe mundësia e përhapjes së panikut është më e madhe, jo si në raste të tjera kur është vendosur eksplozivi në orët e para të mëngjesit me qellim shkatërrimin e objektivave.