Një shpërthim ka ndodhur në një bllok banesash trekatëshe në Hagë, Holandë, duke shkaktuar shembjen e disa shtëpive në zonën Tarwekamp rreth orës lokale 06:15. Policia ka raportuar se janë në kërkim të rreth 20 personave që mendohet se kanë qenë aty në momentin e shpërthimit. Pavarësisht kërkimeve, deri tani 4 persona janë nxjerrë nga rrënojat dhe janë dërguar në spital.

Banorët e lagjes treguan se dëgjuan një zhurmë të madhe pas të cilës shpërthyen britma. Një grua e intervistuar nga mediat lokale tha se në momentin e shpërthimit mendoi se kishte ndodhur një tërmet. Ndërsa shkaqet e shpërthimit ende nuk janë përcaktuar, mediat holandeze raportojnë se policia ka nisur hetimet dhe është në kërkim të një automjeti që u largua me shpejtësi disa çaste pas incidentit.

Në vendngjarje ka mbërritur një ekip i specializuar kërkimi dhe shpëtimi, përfshirë 4 qen të trajnuar për të gjetur viktima. Ky ekip ka pasur përvojë të mëparshme gjatë operacioneve kërkim-shpëtimi, përfshirë gjatë tërmetit shkatërrues që ndodhi në Turqi në vitin 2023. Policia dhe ekipet e shpëtimit janë duke punuar për të gjetur të mbijetuarit dhe për të zbuluar shkakun e shpërthimit.