Një shpërthim i fuqishëm ndodhi mesditën e djeshme pranë Liqenit të Ujmanit në Kosovë, duke shkaktuar vetëm dëme materiale dhe pa të lënduar. Mediat kosovare raportojnë se dy makina u dëmtuan nga shpërthimi, ndërsa Zëvendësdrejtori i Policisë së Kosovës për pjesën veriore, Veton Elshani, konfirmoi mungesën e të lënduarve.

“Ka një shpërthim, pasi të kalohet tuneli i 5-të në anën e majtë. Ka pas dëme materiale në dy vetura, të lënduar nuk ka. Rrethanat se si ka ndodh deri të shpërthimi nuk dihen, policia është duke u marrë me rastin,” tha Elshani. Ai shtoi se shpërthimi erdhi nga një granatë dore, pa dhënë detaje të mëtejshme.

Incidenti ndodhi në një kohë kur temperaturat e larta kanë shtyrë qytetarët e zonës të frekuentojnë liqenin për plazh. Një prej tyre madje filmoi momentin e shpërthimit. Kryeministri i Kosovës, Albin Kurti, reagoi ashpër, duke akuzuar Serbinë për përfshirje në këtë incident.

“Duke e humbur ndikimin në këtë zonë, nervozi bëhet agresivi.
Edhe grupe të ndryshme kriminale, pak a shumë të lidhura me të, kanë humbur mundësinë për përfitime enorme çfarë i patën për më shumë se dy dekada që nga çlirimi i Kosovës. Kjo pjesë, ashtu si të gjitha të tjerat e vendit tonë, me potencialin dhe bukuritë e saj do të përdoret nga të gjithë qytetarët pa dallim”, ka thënë Kurti, përmes një postimi në Facebook.

Liqeni i Ujmanit konsiderohet pikë strategjike vitale për Kosovën, pasi përpos të tjerave, aktualisht furnizon me ujë, një zonë me mbi 500 mijë kosovarë.