Në fshatin Berdicë e Mesme të Shkodrës, një 16-vjeçar nga Afganistani, i dyshuar i trafikuar dhe shfrytëzuar për punë, është shpëtuar nga policia gjatë një operacioni të koduar “Minoreni”. Adoleshenti mbahej me forcë dhe detyrohej të punonte në një servis automjetesh të drejtuar nga dy vëllezër.
Policia ka arrestuar Alehandro Pashukun, 18 vjeç, dhe ka shpallur në kërkim të vëllain e tij, Kristjan Pashukun, 33 vjeç. Gjithashtu, janë proceduar në gjendje të lirë një tjetër vëlla, L. P., 31 vjeç, dhe babai i tyre, A. P., 57 vjeç, të dy banues në të njëjtin fshat. Ata përballen me akuzat për “Prodhim dhe mbajtje pa leje të armëve, armëve shpërthyese dhe municionit”, si dhe për “Fshehje të të ardhurave” dhe “Kontrabandë me mallra të tjera”.
Gjatë kontrollit në servisin e familjes Pashuku, Policia sekuestroi një armë zjarri automatik, një pistoletë imituese për zhurmë, një armë sportive pneumatike dhe municion luftarak. Lajmi mbi minorenin afgan u mësua pas një informacioni të marrë nga Interpol Tirana, i cili vuri në dijeni autoritetet për këtë rast trafikimi.
Adoleshenti u gjet në gjendje të mirë shëndetësore dhe tashmë është nën kujdesin e autoriteteve, ndërsa hetimet vazhdojnë për të zbardhur plotësisht rastin dhe për të kapur të gjithë personat e përfshirë në këtë rrjet të dyshuar shfrytëzimi dhe trafikimi të të miturve.
Materialet procedurale janë dorëzuar në Prokurorinë pranë Gjykatës së Shkallës së Parë të Juridiksionit të Përgjithshëm në Shkodër për veprime të mëtejshme.
