Një grua në Spanjë ka shpëtuar mrekullisht pas 72 orësh, pasi mbeti e bllokuar në makinën e saj përmbytur nga uji në një nënkalim në komunën e Benetússer, Valencia. Kryetari i shërbimit të mbrojtjes civile të Valencias, Martín Pérez, deklaroi se “pas tre ditësh, gjetëm dikë të gjallë në makinë,” duke e cilësuar këtë si një shpëtim të rrallë.

Ndërsa përmbytjet e fuqishme kaluan nëpër rajon, makina e gruas u hodh nga rrymat e ujit dhe përfundoi e mbuluar nga një grumbull automjetesh të tjera në një nënkalim. Të premten, shërbimet e emergjencës dëgjuan thirrje të dëshpëruara për ndihmë – “Doktor, doktor” – dhe ndoqën zërin që vinte nga grumbulli i automjeteve të bllokuara. Pas orësh të gjata duke pastruar mbeturinat, ata arritën ta shpëtonin gruan dhe e dërguan menjëherë në spital.

Mediat spanjolle përshkruan shpëtimin e saj si një “mrekulli,” një moment shprese në mes të përmbytjeve tragjike që kanë lënë të paktën 217 viktima dhe një numër ende të panjohur të zhdukurish në vend.