Qeveria shqiptare ka marrë rreth 589 milionë euro kredi të huaja për sektorin e ujësjellës-kanalizimeve, nga të cilat rreth 300 milionë euro janë marrë pas vitit 2015, sipas të dhënave zyrtare të Ministrisë së Financave. Megjithatë, qytetet e vendit vazhdojnë të përballen me mungesa të ujit të pijshëm dhe humbje të larta në rrjet.

Të dhënat e Entit Rregullator të Ujit tregojnë se humbjet teknike në rrjet arritën 67% në vitin 2024, pak më shumë se 64% në 2023, duke qëndruar në nivele të ngjashme edhe më parë. Ekspertët theksojnë se problemi nuk qëndron te prodhimi i ujit – kapaciteti vjetor mesatar i burimeve për prodhimin e ujit të pijshëm për vitin 2021 ishte 495 milionë metra kub – por te menaxhimi i dobët dhe mungesa e faturimit të ujit.

Investimet e bëra, shpesh të shpërndara në projekte të vogla dhe të fokusuar kryesisht në ndërtimin e infrastrukturës së re, nuk kanë arritur të përmirësojnë rrënjësisht furnizimin. Të dhënat tregojnë se vëllimi i prodhuar i ujit në të gjitha shoqëritë e UK për vitin 2021 ishte 311,2 milionë metra kub, ndërsa kërkesa totale e qytetarëve ishte rreth 100 milionë metra kub.

Sipas ekspertëve, vetëm përgjysmimi i humbjeve teknike do të rrisë furnizimin me 30–40% dhe do të mundësonte 24 orë në ditë shërbim për shumicën e qyteteve, pa pasur nevojë për burime të reja. Por deri më tani, mungesa e planifikimit dhe menaxhimi joefektiv kanë bërë që Shqipëria të mbetet larg standardeve të furnizimit të qëndrueshëm me ujë.