Shqipëria renditet në krye të listës së vendeve të Europës të cilat kanë më shumë festa zyrtare në kalendarin e tyre, e për rrjedhojë, edhe më shumë ditë pushimi për administratën.

Në kalendarin e festave për vitin 2021 të publikuar nga Banka e Shqipërisë janë plot 14 ditë festive. Në të gjitha këto festa të gjitha institucionet janë të mbyllura dhe ditë pushimi për administratën publike, e cila është ndër kategoritë më fatlume në Shqipëri në këtë aspekt, pasi në sektorin privat puna vazhdon edhe përtej festave zyrtare. Por privilegjet e administratës publike shkojnë deri aty sa në rastet kur festat zyrtare bie në ditët e pushimit javor, e shtunë ose e diel, dita e pushimit shtyhet dhe dita e hënë është automatikisht ditë pushimi.

Nëse i hedhim një sy kalendarit të këtij viti, deri më sot janë konsumuar 10 ditë pushimi, ndërsa mbeten edhe 4 të tjera. Konkretisht, administrata publike do të jetë pushim më datat 28 dhe 29 nëntor, Dita e Flamurit dhe e Pavarësisë dhe Dita e Çlirimit; data 8 dhjetor Dita Kombëtare e Rinisë dhe 25 dhjetor Krishtlindjet.

Shqiptarët festuan dy ditët e para të vitit me rastin e festës së ndërrimit të viteve. Pushimit administrata iu rikthye më 14 mars, me rastin e Ditës së Verës, ndërsa po në të njëjtin muaj, më datë 22 mars, festoi edhe Ditën e Nevruzit.

E diela e Pashkëve Katolike më datën 4 prill riktheu pushimin, ndërsa maji nisi me Festën e Ditës Ndërkombëtare të Punëtorëve më datë 1 dhe në datën dy administrata festoi të Dielën e Pashkëve Ortodokse, për të vazhduar më datën 13 me Festën e Bajramit të Madh. Administrata iu rikthye pushimit për shkak të festave zyrtare më datën 20 korrik me rastin e ditës së Kurban Bajramit. Në Europë, Shqipëria është ndër ato vende që ka më shumë ditë zyrtare pushimi. Greqia dhe Italia kanë përkatësisht nga 12 ditë. Mali i Zi gjithashtu ka të njëjtin numër ditësh pushimi zyrtare si Shqipëria, 14, ndërsa Kosova llogarit 12.