Shqipëria ka arritur një fitore të rëndësishme ndaj Ukrainës me rezultatin 2-1 në ndeshjen e parë të Ligës së Kombeve, duke e nisur me këmbën e mbarë rrugëtimin në këtë kompeticion. Kuqezinjtë zhvilluan një ndeshje të shkëlqyer, duke dominuar nga fillimi deri në fund.
Pas ndeshjes, mesfushori Kristjan Asllani foli për mediat dhe theksoi rëndësinë e kësaj fitoreje për avancimin e skuadrës në Ligën e Kombeve. Ai u shpreh se ishte një ndeshje e vështirë dhe që fitimi i 3 pikëve është shumë i rëndësishëm. Asllani gjithashtu ndau mendimet e tij për një incident në fushë, ku pati një hatërmbetje me sulmuesin Rey Manaj për shkak të një faulli që Manaj mori përsipër dhe i mori topin për të goditur.
“Fitore e madhe dhe shumë e rëndësishme. Ishte shumë e vështirë kjo fitore ndaj Ukrainës. Mendoj se ata e mbajtën më shumë topin dhe ne u mbrojtëm, por kishim shumë nevojë për këtë fitore dhe shikojmë përpara sepse kemi një ndeshje të vështirë përpara. Kjo fitore na ndihmon shumë, sidomos sepse ishte ndeshja e parë. Kur e fillon mirë je një hap para. Provuam të luanim futbollin tonë, por mendoj se mund të kishim luajtur më mirë. Megjithatë, morëm 3 pikët dhe kjo është ajo që ka rëndësi. Pas ndeshjes me Çekinë, ku nuk fituam, jemi të lumtur që fituam dhe vazhdojmë të punojmë“, tha Asllani.
Sa i përket incidentit me Manaj, Asllani tha: “Faulli që nuk mu lejua të godasja? Jam shumë shok me Rey, por u mërzita pak në fushë. Goditjet e dënimit i kam goditur që i vogël, por edhe Rey ka gjuajtje të mira. U mërzita pak në fushë, por absolutisht jam shumë shok me Rey, nuk ka problem. Në ndeshjen tjetër do e godas unë,” përfundoi ai.
