Një i ri shqiptar është përballur me akuzën e rëndë për vrasje, pasi u ekstradua nga Franca drejt Anglisë.

Sipas Policisë Metropolitane, Arlind Hashani, 22 vjeç, banues në Bray Fellows Road, NW3, u paraqit më 15 gusht në Gjykatën e Magjistraturës në Westminster, ku u akuzua zyrtarisht për vrasje, pas ekstradimit nga Franca.

Hashani u arrestua në Paris më 30 korrik, ndërsa pas ekstradimit, gjykata vendosi ta mbajë në paraburgim. Ai do të dalë sërish përpara Gjykatës së Lartë në Wood Green të martën, më 19 gusht.

Ngjarja për të cilën akuzohet i riu ka ndodhur më 29 dhjetor 2023, kur Ahmed Ali Jama, 29 vjeç, u gjet i plagosur rëndë me thikë pranë zonës Gaymead, në Abbey Estate, Abbey Road, rreth orës 19:32. Pavarësisht ndihmës së dhënë menjëherë në vendngjarje, ai ndërroi jetë në spital.