Një arratisje spektakolare ka ndodhur në burgun e Operas në Milano, ku 41-vjeçari shqiptar Taulant Toma, i njohur për tentativat e mëparshme të arratisjeve, arriti të largohej duke prerë hekurat e qelisë dhe duke përdorur çarçafë të lidhur për të zbritur nga dritarja.
Sipas hetuesve, Toma arriti të ngjitej mbi murin rrethues të objektit me lartësi 6 metra dhe u zhduk në mes të natës, duke shpërthyer alarmet e burgut dhe duke vënë në lëvizje autoritetet italiane.
Hetuesit po analizojnë kamerat e sigurisë për të rindërtuar ngjarjen dhe për të kuptuar nëse burgosurit e tjerë kanë ndihmuar në arratisjen e tij. Po ashtu, po hetohen kontaktet që shqiptari mund të ketë pasur para arratisjes.
Ky nuk është një rast i izoluar. Para incidentit në Milano, Toma kishte tentuar të arratisej katër herë të tjera:
• E fundit në shkurt 2013, nga burgu i Parmës, ku u kap disa muaj më vonë në Belgjikë;
• Pas transferimit në një burg pranë Liège, arriti sërish të arratisej;
• Arratisja e parë daton në vitin 2009 nga burgu i Ternit.
41-vjeçari vuante dënimin në një njësi sigurie maksimale për një sërë krimesh, përfshirë grabitje, dhe arratisja e tij ka ngritur alarmin në të gjithë Italinë, ku autoritetet po zhvillojnë një operacion të gjerë për kapjen e tij.
