Një 51-vjeçare me origjinë shqiptare është arrestuar nga karabinierët në Magione, Itali, pasi u kap me lëndë narkotike të llojit kokainë dhe dyshohet për shpërndarje droge.

Gjithçka nisi pasi forcat e rendit ndaluan për kontroll dy burra në një automjet, të cilëve iu gjetën 0,7 gramë dhe 1,3 gramë kokainë, duke u referuar si përdorues.

Gjatë kontrollit të mëtejshëm në banesën e njërit prej tyre, policia gjeti aty edhe 51-vjeçaren shqiptare. Në momentin që pa forcat e rendit, ajo tentoi të hidhte tre qese të vogla hermetike me gjithsej 1,70 gramë kokainë.

Nga kontrolli personal u sekuestruan edhe 4 qese të tjera me 2,20 gramë kokainë, 50 euro cash – të dyshuara si të ardhura nga shitja e drogës – si dhe një telefon celular.

Gruaja u arrestua në flagrancë për veprën penale të “posedimit me qëllim shpërndarjeje të lëndëve narkotike” dhe pas procedurave të zakonshme u mbajt në qelitë e sigurisë.

Gjykata e Città della Pieve konfirmoi arrestimin dhe vendosi masën e ndalimit të kthimit në Provincën e Perugias deri në përfundim të procesit gjyqësor.