Kryeministri Edi Rama ka ndarë mëngjesin e sotëm në rrjetet sociale një video ekskluzive nga brenda strukturës ku do të mbahet Samiti i Komunitetit Politik Europian në Tiranë. Ai e ka quajtur këtë hapësirë “Shtëpia e Europës”, një simbolikë që sipas tij është realizuar me ndihmën e më të vegjëlve të vendit.
“Shtëpia e Europës është krijuar me vizatimet e fëmijëve të Shqipërisë”, shkruan Rama, duke theksuar se sot Europa ka zbritur në Shqipëri dhe se e gjithë bota do të mbajë sytë nga Tirana.
Në postimin e tij, Rama shprehet:
“MIRËMËNGJES dhe me Shtëpinë e Europës, krijuar me vizatimet e fëmijëve të Shqipërisë, ku sot ka zbritur e gjithë Europa e ku do të mbajë sytë e gjithë bota, ju uroj një ditë të mbarë.”
Pamjet e shpërndara tregojnë një strukturë moderne dhe të ngrohtë, ku motivet artistike të fëmijëve janë bërë pjesë e dizajnit dhe atmosferës pritëse të një ngjarjeje të rëndësishme për kontinentin. Ky është një prej samiteve më të rëndësishëm që zhvillohet në Tiranë, duke e vendosur Shqipërinë në qendër të vëmendjes europiane dhe ndërkombëtare.
Në këtë samit marrin pjesë liderët më të rëndësishëm të vendeve të Bashkimit Europian dhe të vendeve të Ballkanit Perëndimor, ndërkohë që fokusi i diskutimeve do të jetë siguria, stabiliteti dhe integrimi europian.
