Stilistja e njohur shqiptare, Yllka Brada, është bërë viktimë e një grabitjeje të shtunën pasdite, kur makina e saj u thye dhe sendet personale iu vodhën.

Në një reagim në InstaStory, Brada ka ndarë zhgënjimin e saj për mungesën e reagimit të institucioneve pas incidentit. Ajo tregon se ka pritur për katër orë që një hetues të mbërrinte në vendngjarje, por në fund ka marrë vetëm një dokument formal, pa asnjë ndihmë konkrete.

“Shtet i lodhur! Faji mbetet i askujt, dëmi i imi, siguria iluzion, e humbja e kohës dhe nervave – gjë normale”, shkruan Brada, duke denoncuar vonesën dhe mungesën e efikasitetit nga ana e autoriteteve.

Ky rast ka shkaktuar reagime të shumta në rrjetet sociale, ku ndjekësit e stilistes i kanë shprehur mbështetje, ndërsa të tjerë kanë kritikuar mungesën e sigurisë dhe indiferencën e institucioneve.

Për momentin, ende nuk dihet nëse policia ka nisur një hetim për identifikimin dhe kapjen e autorëve.