Akademiku Artan Fuga, ka analizuar zhvillimet e brendshme në Partinë Demokratike.

Në një status në Facebook, Fuga shkruan se ndarja brenda partisë sipas tij është një lajm i mirë, ndërsa shton se prej muajsh ka thënë se që vetëm ndarja e prerë e ndihmon partinë më të madhe opozitare në vend në qartësimin e pozicioneve të deputetëve .

STATUSI:

Ndarja brenda partisë demokratike – një lajm i mirë!

U desh që Partia Demokratike të hante një goditje nga ana e vendimit të fundit gjyqësor, që të kuptohej, apo të pranohej zyrtarisht, se deputetë dhe figura politike brenda saj, antagoniste midis tyre, nuk mund të qendronin bashkë në atë parti.

Bashkim fallco!

Unë kam muaj që e them që vetëm ndarja e prerë në atë parti ndihmon në qartësimin e pozicioneve të deputetëve që janë në kolltuk me votën e elektoratit demokrat, ndihmon në qartësimin e elektoratit dhe të jetës politike në përgjithësi, si edhe ndihmon vetë atë parti dhe vetë demokracinë në vend!

Përjashtohuni! Vetëpërjashtohuni! Bashkëpërjashtohuni!

Ndarja në histori sjell përparim. Uniteti fallco, është si llum, si ujë i mbetur, si moçal.

Shpresë e kotë se do të ruash fondet e paprekura, pronësinë e paprekur të ndërtesës, park veturash etj, duke qendruar nën një çati si ato çiftet e divorcuara që nuk kanë se ku jetojnë të ndarë!

Grupi i Bashës të përjashtojë kundërshtarët në Parti, sikurse drejtuesit e Partisë Demokratike, zoti Berisha, të përjashtojë ata që nuk janë me të!

Sikurse bëri me Bashën dhe Alibeajn, por ende në formë deklarate politike, pa një vendim normativ partiak!

Por jo vetëm me ta! Duhen pyetur të gjithë deputetët : Me kë grupim jeni? Se kështu, edhe Kuvendi është bërë lëmsh!

Vetë populli opozitar nuk di se kush është kushi! Kjo e dëmton fuqinë elektorale opozitare pra edh interesin tonë si qytetarë, pa qenë militantë politikë, por që mendojmë se shoqëria jonë ka nevojë edhe për pushtet të drejtë edhe opozitë të fortë!

Me vonesë, shumë me vonesë, por ndarja duket sikur filloi. Kjo nuk bëhet me deklarime, por me vendime organesh drejtuese.

Gjithmonë me shumë vonesë lëvizjet brenda opozitës, nuk di dot përse, por gjithmonë vijnë vetëm si reagim i fakteve të kryera të imponuara dhe nuk paraprijnë!

Por, tani një slogan ka : bashkëpërjashtohuni!

Sikurse po deklarohet! Ndarja e qartë në parti, në Kuvend, kudo, sjell unitet në elektorat!

Uniteti i sëmurë, fallco, përçan elektoratin, kurse ndarja si qartësim në grupin e deputetëve dhe parti, e unifikon elektoratin!

Me një fjalë është koha të pyesni njeri tjetrin: Me kë je ti miku im?